ದೇಶ ಸುತ್ತು: ಉತ್ತರ ಭಾರತ ಪ್ರವಾಸ - ಭಾಗ ೪

- ಅಕ್ಷಯರಾಮ ಕಾವಿನಮೂಲೆ

[ಮೊದಲನೇ ಭಾಗಕ್ಕಾಗಿ - ದೇಶ ಸುತ್ತು: ಉತ್ತರ ಭಾರತ ಪ್ರವಾಸ - ಭಾಗ ೧

  ಎರಡನೇ ಭಾಗಕ್ಕಾಗಿ - ದೇಶ ಸುತ್ತು: ಉತ್ತರ ಭಾರತ ಪ್ರವಾಸ - ಭಾಗ ೨

 ಮೂರನೇ ಭಾಗಕ್ಕಾಗಿ - ದೇಶ ಸುತ್ತು: ಉತ್ತರ ಭಾರತ ಪ್ರವಾಸ - ಭಾಗ ೩]

ಮರುದಿನ ಬೆಳಗ್ಗೆ ತಿಂಡಿ ಮುಗಿಸಿ ರಿಷಿಯ ಇನ್ನೋವಾ ಏರಿದೆವು. ಮತ್ತದೇ ಹಿಮಾಚಲದ ಜನಪದ ಶೈಲಿಯ ಹಾಡುಗಳನ್ನು ಕೇಳುತ್ತಾ ಹೊರಟಿತು ನಮ್ಮ ಪಯಣ. ಮನಾಲಿಯಿಂದ ಶಿಮ್ಲಾಕ್ಕೆ ಬರೋಬ್ಬರಿ ಏಳೆಂಟು ಗಂಟೆಗಳ ದಾರಿ. ಅಷ್ಟರಲ್ಲಾಗಲೇ ಆ ತಿರುವುಗಳಿಗೆ ನಮ್ಮ ದೇಹ ಹೊಂದಿಕೊಂಡಾಗಿತ್ತು. ಸುತ್ತಲಿನ ಪ್ರಕೃತಿಯ ರಮಣೀಯ ಸೌಂದರ್ಯ ಸವಿಯುತ್ತಾ ಕುಳಿತೆವು.
ರಸ್ತೆಯ ಎಡಭಾಗದಲ್ಲಿ ಬಿಯಾಸ್ ನಮ್ಮೊಂದಿಗೇ ಸಾಗುತ್ತಿತ್ತು. ಕುಲು ತಲುಪುವ ಮುನ್ನ ಡ್ರೈವರ್ ರಿಷಿ "ರಾಫ್ಟಿಂಗ್ ಮಾಡುತ್ತೀರಾ ?" ಎಂದು ವಿಚಾರಿಸಿದ. ಆದರೆ ಕತ್ತಲಾಗುವ ಮುನ್ನ ಶಿಮ್ಲಾ ತಲುಪುವ ಹಂಬಲದಿಂದ ರಾಫ್ಟಿಂಗ್ ಕೈಬಿಟ್ಟು ಮುಂದೆ ಸಾಗಿದೆವು. ಪುಟ್ಟ ಮಗಳನ್ನು ಕೂರಿಸಿಕೊಂಡು ಉಕ್ಕಿಳಿಯುವ ಬಿಯಾಸ್ ನದಿಯಲ್ಲಿ ಸವಾರಿ ಮಾಡಲು ಧೈರ್ಯವೂ ಇರಲಿಲ್ಲ !

ಕುಲುವಿನ ಬಳಿ ಶಾಲುಗಳನ್ನು ತಯಾರಿಸುವ ಘಟಕಕ್ಕೆ ಹೋದೆವು. ಕೈಮಗ್ಗದಲ್ಲಿ ವಿಶ್ವವಿಖ್ಯಾತ 'ಕುಲು ಶಾಲ್' ತಯಾರಾಗುವುದನ್ನು ಕಂಡೆವು. ರಿಯಾಯಿತಿ ದರದಲ್ಲಿ ಒಂದಷ್ಟು ಶಾಲು, ಮಫ್ಲರುಗಳನ್ನೂ ಕೊಂಡೆವು. ದೂರದ ಊರುಗಳಿಂದ ಬರುವ ಪ್ರವಾಸಿಗರ ಅನುಕೂಲಕ್ಕಾಗಿ ಉತ್ಪನ್ನಗಳನ್ನು ಮನೆಬಾಗಿಲಿಗೇ ಕಳುಹಿಸುವ ವ್ಯವಸ್ಥೆ ಇದೆ ಇಲ್ಲಿ. ನಮಗೆ ಬೇಕಾದದ್ದನ್ನು ಆರಿಸಿ ಹಣ ಪಾವತಿಸಿದರೆ ನಾವು ಮರಳಿ ಊರಿಗೆ ತಲುಪುವಾಗ ಶಾಲುಗಳು ನಮ್ಮ ಮನೆಗೆ ಹಾಜರ್ ! ಪ್ರವಾಸೋದ್ಯಮ ಬೆಳವಣಿಗೆ ಹಿಮಾಚಲದಲ್ಲಿ ಆದಷ್ಟು ಭಾರತದೆಲ್ಲೆಡೆ ಆದರೆ ಎಷ್ಟು ಚೆನ್ನ ಎನಿಸಿತು.

ಬಿಯಾಸ್ ನದಿಯ ಪಕ್ಕದಲ್ಲೇ ಸಾಗಿತು ನಮ್ಮ ಪಯಣ. ಮಾರ್ಗ ಮಧ್ಯೆ ಹಿಂದಿನ ದಿನದ ಭೂಕುಸಿತದ ತೆರವು ಕಾರ್ಯ ನಡೆದಿತ್ತು. ಆ ಇಕ್ಕಟ್ಟಾದ ರಸ್ತೆಯಲ್ಲೂ ವಾಹನಗಳು ಸಾಲುಗಟ್ಟಿ ನಿಂತಿದ್ದವು. ಭಾರೀ ವಾಹನಗಳ ಸಂಚಾರ ಇಲ್ಲದಿದ್ದ ಕಾರಣ ಜಾಸ್ತಿ ಹೊತ್ತು ಕಾಯದೇ ಮಣ್ಣಿನ ರಾಶಿಯೇರಿ ದಾಟಿತು ಇನ್ನೋವಾ. ಆದ ಅವಘಡದ ಅಗಾಧತೆ ಕಂಡು ಭಯವಾಯಿತು. ಬಿಯಾಸ್ ನದಿ ಅರ್ಧ ಮುಚ್ಚಿ ಹೋಗಿತ್ತು ಕಲ್ಲು ಮಣ್ಣಿನ ರಾಶಿಯಿಂದ ! ಆ ಕುಸಿತವೇನಾದರೂ ಬೆಳಗ್ಗೆ ಆಗಿದ್ದರೆ ನಮ್ಮ ಗತಿ ? ದೇವರೇ ಕಾಪಾಡಿದ್ದ.

ಮುಂದೆ ಸಾಗಿದಂತೆ ಬಿಯಾಸ್ ನದಿಯ ಚಲನೆ ನಿಂತಂತೆ ಭಾಸವಾಯಿತು. ಕಟ್ಟಿದ ಅಣೆಕಟ್ಟು ನದಿಯ ಓಟವನ್ನು ತಡೆದಿತ್ತು. ವಿಶಾಲವಾದ ನೀರು ನೀಲಿಗಟ್ಟಿ ಸರೋವರವಾಗಿ ಕುಳಿತಿತ್ತು. ಆ ನಿರ್ಮಲತೆಯೆದುರು ನಿಂತು ಫೋಟೋ ತೆಗೆಸಿಕೊಂಡೆವು.

ಹಿಮದ ಟೊಪ್ಪಿಗೆಯಿಲ್ಲದ ಹಸಿರು ಗುಡ್ಡಗಳ ಸಾಲು ಮುಂದಿನ ರಸ್ತೆಯುದ್ದಕ್ಕೂ. ದಾರಿಮಧ್ಯೆ ಎಲ್ಲೋ ಒಂದೆಡೆ ಊಟಕ್ಕೆ ನಿಂತೆವು. ಅದೊಂದು ಹಳೆಯ ಹೋಟೆಲ್. ಒಂದು ಕಾಲದಲ್ಲಿ ವೈಭವಯುತವಾಗಿತ್ತು ಎಂಬುದನ್ನು ತೋರಿಸಲು ಗೋಡೆ ತುಂಬಾ ಹಿಂದಿ ಚಿತ್ರನಟರು ಅಲ್ಲಿಗೆ ಬಂದಿದ್ದಾಗ ತೆಗೆಸಿಕೊಂಡ ಫೋಟೋಗಳು ಸಾಕ್ಷಿಯಾಗಿ ನಗುತ್ತಿದ್ದವು. ಭಾರತೀಯ ಚಿತ್ರರಂಗ ಹಿಮಾಚಲದಲ್ಲಿ ಮರ ಸುತ್ತುತ್ತಿದ್ದ ಕಾಲವೊಂದಿತ್ತು, ಈಗೇನಿದ್ದರೂ ವಿದೇಶಗಳಲ್ಲಿಯೇ ಶೂಟಿಂಗ್ !

ಸುರುಳಿ ಸುತ್ತುತ್ತಾ ಹಾವಿನಂತೆ ಮಲಗಿದ ರಸ್ತೆ, ಸಾಗಿದಷ್ಟೂ ಮುಗಿಯುತ್ತಿಲ್ಲ ಎನಿಸಿತು. ಸಂಜೆ ಐದಾದರೂ ಶಿಮ್ಲಾ ತಲುಪಲಿಲ್ಲ. ಸುಂದರ ಸೂರ್ಯಾಸ್ತವನ್ನು ಕಣ್ತುಂಬಿಕೊಂಡೆವು. ಫೋಟೋ ತೆಗೆಯಲು ನಿಲ್ಲಿಸಿದರೆ ಮತ್ತಷ್ಟು ತಡವಾದೀತು ಎಂದು ಕಣ್ಣಲ್ಲೇ ಚಿತ್ರೀಕರಿಸಿಕೊಂಡು ಸಮಾಧಾನ ಪಟ್ಟೆವು. ಅಂತೂ ಇಂತೂ ಸಂಜೆ ಆರು ಗಂಟೆ ಕಳೆದ ಮೇಲೆ ಶಿಮ್ಲಾ ತಲುಪಿ ಹೋಟೆಲ್ ಸೇರಿದೆವು. ಅದ್ಭುತವಾದ ಬಿಸಿನೀರಿನ ಸ್ನಾನ ದಣಿದ ದೇಹಕ್ಕೆ ಹಿತ ನೀಡಿತು. ಊಟಮಾಡಿ ಮತ್ತೆ ರಜಾಯಿಯೊಳಗೆ ಮುರುಟಿಕೊಂಡೆವು. ಸೆಂಟ್ರಲ್ ಹೀಟಿಂಗ್ ಇದ್ದ ಕಾರಣ ಕೋಣೆ ಬೆಚ್ಚಗಿತ್ತು. ಸುಖನಿದ್ದೆ ನಮಗಾಗಿ ಕಾದಿತ್ತು.

ಶಿಮ್ಲಾ:
ಮರುದಿನ ಎದ್ದವನಿಗೆ ಯಾಕೋ ಹೊಟ್ಟೆ ಕೈಕೊಟ್ಟಿತ್ತು. ಹತ್ತಿರದ ಅರೆವೈದ್ಯರಲ್ಲಿಗೆ ಹೋಗಿ ಮಾತ್ರೆ ತೆಗೆದುಕೊಂಡು ಬಂದು ಮಲಗಿದೆ. ಶಿಮ್ಲಾದಲ್ಲಿನ ಅರ್ಧ ದಿನವನ್ನು ಅನಾರೋಗ್ಯವೇ ತಿಂದುಹಾಕಿತು !

ಸುಧಾರಿಸಿಕೊಂಡು ಊಟ ಮಾಡಿ ಹೊರಟಾಗ ಶಿಮ್ಲಾದ ಗಿರಿಶೃಂಗಗಳನ್ನು ಮೋಡಗಳು ಮುಚ್ಚಿಕೊಂಡು ಕತ್ತಲಾವರಿಸಿತ್ತು. ಹೋಟಲಿನ ಸ್ವಾಗತಕಾರ ಸುರೇಂದರ್ "ಬರಫ್ ಗಿರ್ ಸಕ್ತಾ ಹೈ ಸರ್" ಎಂದು ಆಸೆ ಹುಟ್ಟಿಸಿದ. "ಕುಫ್ರಿ ಮೇ ತೋ ಬರಫ್ ಗಿರೇಗಾ ಹಿ ಗಿರೇಗಾ. ಆಪ್ ಅಭೀ ಗಾಡೀ ಲೇಕೇ ಕುಫ್ರಿ ಜಾಯಿಯೇ" ಎನ್ನುತ್ತಾ ಪಕ್ಕದಲ್ಲೇ ಇದ್ದ ಟ್ಯಾಕ್ಸಿಯವನ ಕರೆದು ಬಾಡಿಗೆ ಮಾತಾಡಿ ನಮ್ಮನ್ನು ಜೊತೆಮಾಡಿ ಕಳುಹಿಸಿದ.

ನಮ್ಮ ಡ್ರೈವರ್ ರಾಜೇಶ್ ಸಮಾಧಾನಿ. ಅತ್ಯಂತ ಸಾವಧಾನವಾಗಿ ಕಾರು ಓಡಿಸುತ್ತಾ ಶಿಮ್ಲಾದ ಇಕ್ಕಟ್ಟಾದ ರಸ್ತೆಗಳಲ್ಲಿ ಸಾಗಿದ. ಕುಫ್ರಿಗೆ ತಲುಪುವ ಮೊದಲೇ ರಸ್ತೆಬದಿಯಲ್ಲಿ ಎರಡು ಯಾಕ್ ಗಳನ್ನು ಕಟ್ಟಿಹಾಕಿ, ಕಟ್ಟಿಗೆ ಉರಿಸಿ ಚಳಿಕಾಯಿಸುತ್ತಾ ಒಂದಷ್ಟು ಮಂದಿ ಕುಳಿತಿದ್ದರು. ರಾಜೇಶ್ ನಮ್ಮನ್ನು ಇಳಿಸಿ ಅವರೊಡನೆ ಕುಳಿತು ಬೆಂಕಿಯನ್ನು ಮಾತಾಡಿಸತೊಡಗಿದ. ಹಿಮಾಚಲದ ಸಾಂಪ್ರದಾಯಿಕ ಬಟ್ಟೆಬರೆ ತೊಟ್ಟು ಯಾಕ್ ಮೇಲೆ ಕುಳಿತು ಫೋಟೋ ತೆಗೆಸಿಕೊಂಡು ಕುಫ್ರಿಯತ್ತ ಹೊರಟೆವು. ಕುಫ್ರಿಯ ಅತ್ಯುನ್ನತ ಶಿಖರ ತಲುಪಲು ತುಸು ದೂರ ಕುದುರೆಯೇರಿ ಸಾಗಬೇಕು. ತುಸು ಚೌಕಾಸಿಮಾಡಿ ಜೋಡಿ ಕುದುರೆಗಳ ಸವಾರರಾದೆವು. ಮೋಡ ದಟ್ಟೈಸಿ ಪುಟ್ಟ ಹನಿಗಳು ಭೂಮಿ ಚುಂಬಿಸತೊಡಗಿದವು. ನೋಡನೋಡುತ್ತಿದ್ದಂತೆ ಮಳೆಹನಿಗಳು ಮಂಜಾಗಿ ಪರಿವರ್ತನೆಯಾದವು. ಚೂರೇಚೂರು ಮಂಜನ್ನು ಕಂಡ ಭಾಗ್ಯ ನಮ್ಮದಾಯಿತು. ಒಳ್ಳೆಯ  ಹಿಮಪಾತವನ್ನು ಕಾಣಬಹುದು ಎಂಬ ಆಸೆಗೆ ತಣ್ಣೀರು ಎರಚಿದಂತಾಯಿತು.

(ಮುಂದುವರಿಯುವುದು)