ಕೆನ್ ಹೇಳಿದ ಮೀನಿನ ಕಥೆ ಮತ್ತು ಕನ್ನಡ ಚಿತ್ರಗಳು

- ಮೋಹನ್ ಮೂರ್ತಿ ಮಾ ಕೆಂ

ಕಾರ್ಯ ನಿಮಿತ್ತ ನಾನು ಅಮೇರಿಕಾದಲ್ಲಿದ್ದೇನೆ. ಇಲ್ಲಿ ಕಂಪೆನಿಯಲ್ಲಿ ನನ್ನ ಜೊತೆ ಕೆಲಸ ಮಾಡುವ ನನ್ನ ಕೆಲವು ಸಹೋದ್ಯೋಗಿಗಳು ವಾರದಲ್ಲಿ ಒಂದೆರಡು ದಿನ ಯಾವುದಾದರೂ ಬಾರ್ ಮತ್ತು ರೆಸ್ಟೋರೆಂಟ್ ಗೆ ಹೋಗಿ ಒಂದೆರಡು ಪೆಗ್ ಕುಡಿದು ಒಂದಷ್ಟು ತಿಂಡಿ ತಿನ್ನುತ್ತಾ ಲೋಕಭಿರಾಮವಾಗಿ ಹರಟುತ್ತಾರೆ. ಮದ್ಯಪಾನ ಮಾಡದೇ ಇರುವವರು ಕೋಕೋ ಕೋಲಾ ಅಥವಾ ಸ್ಪ್ರೈಟ್ ನಂತಹ ಯಾವುದಾದರೂ ತಂಪು ಪಾನೀಯ ಕುಡಿಯುತ್ತಾ ಹರಟೆಯಲ್ಲಿ ಪಾಲ್ಗೊಳ್ಳುತ್ತಾರೆ. ಕುಡಿದು ತಿನ್ನುವುದಕ್ಕಿಂತ ಅಲ್ಲಿ ನಡೆಯುವ ಮಾತುಕತೆಗಳು ಸ್ವಾರಸ್ಯವಾಗಿರುತ್ತವೆ.

ಬೇರೆ ಬೇರೆ ದೇಶವಾಸಿಗಳೆಲ್ಲಾ ಒಟ್ಟಿಗೆ ಸೇರುತ್ತಾರಾದ್ದರಿಂದ, ಮಾತು ತಮಿಳುನಾಡು ಮಾಜಿಮುಖ್ಯಮಂತ್ರಿಗಳ ಎರಡನೇ ಹೆಂಡತಿಯ ಮಕ್ಕಳಿಂದ ಹಿಡಿದು ಜಾರ್ಜ್ ಬುಷ್ ಇರಾಕ್ ಮೇಲೆ ಯುದ್ಧ ಸಾರಿದ್ದು ಸರಿಯೋ ತಪ್ಪೋ ಎನ್ನುವವರೆಗೆ ಹರಡಿರುತ್ತವೆ. ಇದು ಒಂದು ತರ ನಮ್ಮ ಹಳ್ಳಿಗಳಲ್ಲಿ, ಅಲ್ಲಿನ ನಾಗರೀಕರು ಅರಳಿಕಟ್ಟೆಯ ಮೇಲೆ ಗಾಜಿನ ಲೋಟದಲ್ಲಿ ಬೈಟು ಟೀ ಕುಡಿಯುತ್ತಾ ಹರಟುವ ಹಾಗೆ, ದೇಶ ಸಮಾಜಕ್ಕೆ ತಕ್ಕ ಹಾಗೆ ಇಲ್ಲಿ ಈ ಸ್ವರೂಪ ಪಡೆದಿದೆ ಅಷ್ಟೆ. ಇದಕ್ಕೆ ಹ್ಯಾಂಗೌಟ್ ಅನ್ನುವ ಹೆಸರೂ ಸಹ ಇದೆ.  ನಾನೂ ಸಹ ಇಂತಹ ಹಲವು ಹ್ಯಾಂಗೌಟ್ ಗಳಲ್ಲಿ ಭಾಗವಹಿಸಿದ್ದೇನೆ. ಬಹುತೇಕ ಹ್ಯಾಂಗೌಟ್ ಗಳಲ್ಲಿ ಇಲ್ಲಿನ ನಮ್ಮ ಪ್ರಾಜೆಕ್ಟ್ ಮ್ಯಾನೇಜರ್ ಕೆನ್ ಇರುತ್ತಾರೆ. ಕೆನ್ ಅವರ ಒಂದು ವಿಶೇಷ ಗುಣವೆಂದರೆ ಅವರು ಲಹರಿಯಲ್ಲಿದ್ದಾಗ ಯಾವುದೇ ವಿಷಯವಾಗಲಿ ಅದನ್ನು ಸಣ್ಣ ಸಣ್ಣ ವಿವರಗಳೊಂದಿಗೆ ಚಿತ್ರವತ್ತಾಗಿ ಬಹಳ ಸ್ವಾರಸ್ಯಕರವಾಗಿ ಹೇಳಬಲ್ಲರು. ಅದನ್ನು ಕೇಳುವವರು ಆ ಎಲ್ಲಾ ವಿವರಗಳೊಂದಿಗೆ  ತಮ್ಮ ಮನಸ್ಸಿನಲ್ಲೇ ಪೂರ್ತಿ ಚಿತ್ರವನ್ನು ಹಾಗೆಯೇ ಪಡಿಮೂಡಿಸಿಕೊಳ್ಳಬಹುದು. ಉದಾಹರಣೆಗೆ ಕೆನ್ ಏನಾದರೂ ಎರಡನೇ ಮಹಾಯುದ್ಧದ ವಿವರ ಕೊಟ್ಟರೆ ಕೇಳುಗರಿಗೆ ತಮ್ಮ ಮುಂದೆಯೇ ಮಹಾಯುದ್ಧ ನಡೆಯುತ್ತಿದೆಯೇನೋ ಎಂದು ಭಾಸವಾಗಬೇಕು.

ಕೆನ್ ಗೆ ಬಹಳ ಪ್ರೀಯವಾದ ಹವ್ಯಾಸವೆಂದರೆ ಮೀನು ಹಿಡಿಯುವುದು. ಇಲ್ಲಿ ಚಳಿಗಾಲದಲ್ಲಿ ತಾಪಮಾನ ಕುಸಿದು ಬಹುತೇಕ ಎಲ್ಲಾ ನದಿಗಳು ಹಿಮದಿಂದಾವೃತ್ತವಾಗಿರುತ್ತವಾದ್ದರಿಂದ ಆ ಸಮಯದಲ್ಲಿ ಮೀನು ಹಿಡಿಯಲು ಸಾಧ್ಯವಿಲ್ಲ. ಬೇಸಿಗೆಯಲ್ಲಿ ವಾತಾವರಣ ಅನುಕೂಲಕರವಾಗಿದ್ದು ಮೀನು ಹಿಡಿಯಲು ಹೇಳಿ ಮಾಡಿಸಿದಂತಿರುತ್ತದೆ. ಆ ಸಂದರ್ಭದಲ್ಲಿ ಬಹುತೇಕ ಎಲ್ಲಾ ವಾರಾಂತ್ಯಗಳಲ್ಲಿ ಕೆನ್ ತಮ್ಮ ಮೀನು ಹಿಡಿಯುವ ಹವ್ಯಾಸದಲ್ಲಿ ಮುಳುಗಿರುತ್ತಾರೆ.

ಹೀಗೆಯೇ ಒಂದು ಹ್ಯಾಂಗೌಟ್ ನಲ್ಲಿ ಕೆನ್ ಮೀನು ಹಿಡಿಯುವುದು ಹೇಗೆ ಎಂದು ಬಹಳ ಸೊಗಸಾಗಿ ವರ್ಣಿಸಿದರು. ಅವರು ಏನು ಹೇಳಿದರೆನ್ನುವುದನ್ನು ಅವರ ಮಾತಲ್ಲೇ ಕೇಳಿ “ಯಾವುದೇ ಸ್ಥಳಕ್ಕೆ ಮೀನು ಹಿಡಿಯುವುಕ್ಕೆಂದು ಹೋದಾಗ ಮೊದಲು ಸುತ್ತಲಿನ ಪರಿಸರವನ್ನು ಗಮನವಿಟ್ಟು ಅಭ್ಯಸಿಸಬೇಕು. ಅಲ್ಲಿರುವ ಗಿಡ, ಮರ, ಚಿಟ್ಟೆ, ಮೀನಿನಲ್ಲಿ ಓಡಾಡುತ್ತಿರುವ ಸಣ್ಣ ಸಣ್ಣ ಹುಳಗಳು, ಸಣ್ಣ ಸಣ್ಣ ಮೀನುಗಳು, ಅವುಗಳ ಬಣ್ಣ, ಗಾತ್ರ ಆಕೃತಿ ಹೀಗೆ ಎಲ್ಲವನ್ನೂ ಗಮನಿಸಬೇಕು. ಇವೆಲ್ಲಾ ಸ್ಥಳದಿಂದ ಸ್ಥಳಕ್ಕೆ ಹಾಗೂ ಕಾಲದಿಂದ ಕಾಲಕ್ಕೆ ಬದಲಾಗುತ್ತವೆ. ಆದ್ದರಿಂದ ಪ್ರತೀ ಬಾರೀ ಮೀನು ಹಿಡಿಯಲು ಹೋದಾಗ ಇವನ್ನೆಲ್ಲಾ ಗಮನವಿಟ್ಟು ನೋಡುವುದು ಬಹಳ ಮುಖ್ಯ. ನಂತರ ಅಲ್ಲಿರುವ ಹುಳಗಳು ಮತ್ತು ಸಣ್ಣ ಸಣ್ಣ ಮೀನುಗಳನ್ನೇ ಹೋಲುವ ಬೇಟ್ (ಮೀನು ಹಿಡಿಯಲು ಗಾಳದಲ್ಲಿ ಇಡುವ ಆಹಾರ) ಗಳನ್ನು ಆಯ್ದು ಗಾಳಕ್ಕೆ ಹಾಕಬೇಕು. ಮೀನುಗಳು ಆ ಪರಿಸರಕ್ಕೆ ಮತ್ತು ಕಾಲಕ್ಕೆ ಹೊಂದಿಕೊಂಡು ಬಿಟ್ಟಿರುತ್ತವೆ, ಆ ಪರಿಸರಕ್ಕೆ ಮತ್ತು ಕಾಲಕ್ಕನುಗುಣವಾಗಿ ನಾವು ಬೇಟ್ ಅನ್ನು ಹಾಕದಿದ್ದರೆ ಅವು ಹತ್ತಿರಕ್ಕೂ ಬರುವುದಿಲ್ಲ. ಆದರೂ ಅವುಗಳು ಅಂತಹ ಕಿಲಾಡಿಗಳೇನಲ್ಲ. ಸರಿಯಾದ ಬೇಟ್ ಹಾಕಿದರೆ ಹಿಂದೆ ಮುಂದೆ ಯೋಚಿಸದೆ ಎಲ್ಲಾ ಒಟ್ಟಿಗೆ ತಿನ್ನಲು ಬಂದು ಗಾಳಕ್ಕೆ ಬೀಳುತ್ತವೆ. ಆ ಸಮಯದಲ್ಲಿ ಚಾಲ್ತಿಯಲ್ಲಿರುವ ಬೇಟ್ ಹಾಕಬೇಕು ಅಷ್ಟೆ.” ಇಷ್ಟೆಲ್ಲಾ ವಿವರಿಸಿ ಅದೂ ಇದೂ ಮಾತುಕತೆಯಾದ ನಂತರ ಎಲ್ಲರೂ ಅಂದು ನಮ್ಮ ನಮ್ಮ ಮನೆಗಳಿಗೆ ಹೊರಟೆವು.

ಈಗ ನಾವು ಕನ್ನಡ ಚಿತ್ರಗಳ ವಿಚಾರಕ್ಕೆ ಬರೋಣ, ನೀವೂ ಗಮನಿಸಿರಬಹುದು. ಯಾವುದೋ ಒಂದು ವಿಷಯದ ಬಗೆಗಿನ ಚಿತ್ರ ಯಶಸ್ವಿಯಾಗುತ್ತಿದ್ದಂತೆ ಅದೇ ಬಗೆಗಿನ ಹಲವಾರು ಚಿತ್ರಗಳು ಧುತ್ತೆಂದು ಪ್ರೇಕ್ಷಕರ ಮೇಲೆರಗುತ್ತವೆ. ಉದಾಹರಣೆಗೆ ತೆಲುಗಿನಲ್ಲಿ ಪುನರ್ಜನ್ಮ ಮತ್ತು ಜನ್ಮಜನ್ಮಾಂತರದ ಸೇಡಿನ ಮಗಧೀರ ಚಿತ್ರ ಭರ್ಜರಿ ಯಶಸ್ವಿಯಾಯಿತು. ಕನ್ನಡದಲ್ಲಿ ಅದೇ ಪುನರ್ಜನ್ಮದ ಕಥೆಯ ಮೇಲೆ ಭಜರಂಗಿ, ವಜ್ರಕಾಯ, ಗಜಕೇಸರಿ ಹೀಗೆ ಸಾಲು ಸಾಲು ಚಿತ್ರಗಳು ಬಂದವು, ಅದಾದ ನಂತರ ಭೂತದ ಕತೆಯ ಚಿತ್ರವೊಂದು ಯಶಸ್ವಿಯಾಯಿತು, ಹಲವಾರು ಭೂತ ಚೇಷ್ಟೆಯ ಚಿತ್ರಗಳು ಬಂದವು. ತಿಥಿಯ ಯಶಸ್ಸಿನ ಬೆನ್ನಲ್ಲೇ ತರ್ಲೆ ವಿಲೇಜ್ ಅನ್ನುವ ಚಿತ್ರ ಶುರುವಾಗಿದೆ. ಆಕಸ್ಮಾತ್ ತರ್ಲೆ ವಿಲೇಜ್ ಏನಾದರೂ ಯಶಸ್ವಿಯಾದರೆ ಇನ್ನೆಂತಹ ತರ್ಲೆಗಳನ್ನು ಪ್ರೇಕ್ಷಕರು ಸಹಿಸಿಕೊಳ್ಳಬೇಕೋ ನೋಡಬೇಕು. ಇದೇನು ಹೊಸ ಕಥೆಯಲ್ಲ ಹಿಂದಿನಿಂದ ರೂಢಿಗತವಾಗಿ ನಡೆದು ಬಂದಿರುವ ಸಂಪ್ರದಾಯ ಇದು. ಓಂ ಚಿತ್ರ ಯಶಸ್ವಿಯಾದ ನಂತರ ಬಂದ ರೌಡಿಸಂ ಚಿತ್ರಗಳು, ಪೋಲಿಸ್ ಸ್ಟೋರಿ ಯಶಸ್ಸಿನ ನಂತರ ಬಂದ ಸಾಲು ಸಾಲು ಪೋಲಿಸ್ ಚಿತ್ರಗಳು ಕೆಲವು ಉದಾಹರಣೆಗಳಷ್ಟೆ. ಒಟ್ಟಿನಲ್ಲಿ ಆ ಸಂದರ್ಭದಲ್ಲಿ ಯಶಸ್ವಿಯಾಗಿರುವ ಚಲನಚಿತ್ರಗಳ ಮೂಲ ವಿಷಯಗಳನ್ನು ಬೇರೆ ಬೇರೆ ರೂಪದಲ್ಲಿ ಪ್ರಸ್ತುತ ಪಡಿಸುತ್ತಾ ಪ್ರೇಕ್ಷಕರನ್ನು ಗಾಳಕ್ಕೆ ಕೆಡವಲು ನೋಡುತ್ತಿರುತ್ತಾರೆ, ಆದರೆ ಕನ್ನಡ ಪ್ರೇಕ್ಷಕರು ಮೀನಿನಂತಲ್ಲ, ಕಿಲಾಡಿಗಳು, ಪ್ರಾರಂಭದಲ್ಲಿ ಹೊಸ ಬದಲಾವಣೆಯ ಕಾರಣಕ್ಕೋ ಏನೋ ಒಂದೆರಡು ಚಿತ್ರಗಳನ್ನು ನೋಡಿ ಯಶಸ್ವಿಗೊಳಿಸಿ, ಅದೇ ರೀತಿಯ ಮೂರನೆಯ ಅಥವಾ ನಾಲ್ಕನೆಯ ಚಿತ್ರ ಬರುವ ಹೊತ್ತಿಗೆ ಸಂಪೂರ್ಣವಾಗಿ ತಿರಸ್ಕರಿಸಿ ಚಿತ್ರ ನಿರ್ಮಾಪಕರನ್ನೇ ಬಲಿ ಹಾಕುತ್ತಿರುತ್ತಾರೆ. ಇದೇನು ಇಂದು ಅಥವಾ ನಾಳೆ ಮುಗಿದು ಹೋಗುವ ಕತೆಯಲ್ಲ. ನಿರಂತರವಾಗಿ ಜಾರಿಯಲ್ಲಿರುವ, ಕನ್ನಡ ಚಿತ್ರಗಳ ಹಣೆಬರಹ ಇದು. ಕೆನ್ ಮೀನಿನ ಕಥೆ ಕೇಳಿ ಇವೆಲ್ಲಾ ನೆನಪಾಯಿತು ಅಷ್ಟೆ.