ರಂಗೋಲಿ ಭಾಷೆ

- ಧನುಷ್‍ಗೌಡ (ಆದರ್ಶ ಮಹದೇವ)

ಎಷ್ಟೋ ಲೇಖನಗಳು ನಮ್ಮ ಅನುಭವದಿಂದಲೇ ರೂಪಾಂತರಗೊಳ್ಳುವುದು. ಈ ಲೇಖನವು ಅದಕ್ಕೆ ಹೊರತಲ್ಲ, ಈ ಘಟನೆ ನಡೆದದ್ದು ಕೆಲವು ತಿಂಗಳುಗಳ ಕೆಳಗೆ. ನನಗೆ ಮುಂಬೈನ ಒಂದು ಐಟಿ ಕಂಪನಿಯಲ್ಲಿ ಕೆಲಸ ಸಿಕ್ಕಿತ್ತು. ಕರ್ನಾಟಕ ಬಿಟ್ಟು ಬೇರೆಲ್ಲೂ ಹೋಗದ ನನಗೆ ಈ ಕೆಲಸಕ್ಕೆ ಸೇರುವುದು ಒಂದು ಸಾಹಸವೇ ಆಗಿತ್ತು. ಮನೆಯವರೆಲ್ಲರ ವಿರೋಧದ ನಡುವೆಯೂ, ಜೊತೆಯಲ್ಲಿ ಓದಿದ್ದ ಗೆಳೆಯರಿದ್ದ ಕಾರಣ ಅಲ್ಲಿಗೆ ಹೋಗುವ ಮನಸ್ಸು ಮಾಡಿದೆ. ಮನಸ್ಸಲ್ಲಿ ಸ್ವಲ್ಪ ಅಂಜಿಕೆಯಿದ್ದರೂ ನನಗೆ ಹಿಂದಿ ತಿಳಿದಿದ್ದರಿಂದ  ಧೈರ್ಯವಿತ್ತು.

ಆಂಗ್ಲ ಮಾಧ್ಯಮದಲ್ಲಿ ಓದಿದ್ದರೂ, ಆ ಭಾಷೆಯ ಮೇಲೆ ಎಳ್ಳಷ್ಟೂ ಆಸಕ್ತಿ ಬೆಳೆಯಲೇಯಿಲ್ಲ. ನಮ್ಮ ಭಾಷೆಯ ಮೇಲೆ ಅಭಿಮಾನವಿದ್ದರೂ, ಭಾರತದ ಇತರೆ ಭಾಷೆಗಳ ಮೇಲೆ ಅಸಡ್ಡೆಯಿರಲಿಲ್ಲ. ಆದ್ದರಿಂದಲೇ ನಾನು ತುಳು, ಕೊಡಗು, ತಮಿಳು, ತೆಲುಗು ಭಾಷೆಗಳನ್ನು ಕಲಿಯಲು ಪ್ರಯತ್ನಿಸಿದ್ದು ಸುಳಲ್ಲ. ಈ ಆತ್ಮವಿಶ್ವಾಸದಿಂದಲೇ ಮಾಯಾನಗರಿ ಮಂಬೈ ಪ್ರವೇಶಿಸಿದೆ. ಆದರೆ ಕೆಲಸಕ್ಕೆ ಸೇರಿದ ಕೆಲವು ದಿನಗಳಲ್ಲೇ ನನ್ನ ಸಹೋದ್ಯೋಗಿಗಳು ನನ್ನನ್ನು ಯಾರೋ ಹೊರಗಿನವನಂತೆ ಕಾಣಲು ಪ್ರಾರಂಭಿಸಿದರು. ಮಾತು ಮಾತಿಗೆ ನೀವು ದಕ್ಷಿಣದವರು ಹೀಗೇಕೆ, ಹಾಗೇಕೆ, ಅನ್ನ ತಿನ್ನೋದೇಕೆ ಎಂದೆಲ್ಲಾ ಹೇಳುವುದರ ಜೊತೆಯಲ್ಲೇ  ನೀವೇಕೆ ರಂಗೋಲಿಯ ಹಾಗೆ ಬರೆಯುತ್ತೀರಿ? ನೇರವಾಗಿ ಬರೆಯಬಾರದೆ ನಮ್ಮ ಹಿಂದಿಯ ಹಾಗೆ. ಅದನ್ನು ಹೇಗೆ ಓದುತ್ತೀರಿ, ಜಿಲೇಬಿಯ ಹಾಗಿದೆ, ರಂಗೋಲಿ ಬಾಷೆ ಎಂದೆಲ್ಲ ಮೂದಲಿಸಲು ಶುರು ಮಾಡಿದರು. ಅದಕ್ಕೆ ನೇರವಾಗಿ ಉತ್ತರಕೊಟ್ಟರೂ ವಿಷಯವನ್ನು ಅವರಿಗೆ ತಲುಪುವ ರೀತಿಯಲ್ಲಿ ಹೇಳುವಷ್ಟು ಪ್ರಭುತ್ವವಿರಲಿಲ್ಲ.
ನಾನು ಅವರಿಗೆ ಭಾರತದ ಎಲ್ಲ ಭಾಷೆಗಳೂ ಸಂಸ್ಕೃತದ ಪ್ರಭಾವಕ್ಕೆ ಒಳಗಾಗಿವೆಯೆಂದೂ, ಹಾಗೆಯೇ ಕನ್ನಡಕ್ಕೂ ಹಿಂದಿ ಭಾಷೆಗೂ ಇರುವ ಸಾಮ್ಯತೆಯ ಬಗ್ಗೆ ಅರಿವು ಮೂಡಿಸುವ ಕಾರ್ಯದಲ್ಲಿ ತೊಡಗಿದೆ. ಅವರು ಹೇಗೆ ಮೇಲೊಂದು ಗೆರೆ ಬರೆದು ಗೆರೆ-ಆಕಾರದ ಸಹಾಯದಿಂದ ಬರೆಯುತ್ತಾರೆ ನಾವು ಹಾಗೆಯೇ ಬರೆಯುತ್ತೇವೆಂದು ಹತ್ತು ಹಲವು ಉದಾಹರಣೆಗಳನ್ನು ಕೊಟ್ಟೆ. ಒಂದು ಬಾರಿ ಅವರ ಬಾಲಿಶವಾದಕ್ಕೆ ನಕ್ಕೆ, ಕೋಪಗೊಂಡು ನಮ್ಮದೇ ಹಳೆ ಬಾಷೆಯೆಂದು ಹೆಮ್ಮೆ ಪಟ್ಟೆ, ಅವರನ್ನು ಜರಿದೆ, ಮನನೊಂದು ಮೌನಿಯಾದೆ. ಹಾಗಾದರೆ ಭಾಷೆಯೆಂದರೇನು? ಯಾವುದು ಮೇಲು, ಯಾವುದು ಕೀಳು?
ನನ್ನ ಅನಿಸಿಕೆಯಲ್ಲಿ ಪ್ರತಿಯೊಂದು ಭಾಷೆಗೂ ಅದರದೇ ಆದ ಇತಿಹಾಸವಿದೆ. ಅದರ ಉದಯ, ಕಾಲಕ್ರಮೇಣ ಆಗುವ ಬದಲಾವಣೆ, ಹೊಸ ಅಕ್ಷರ ಇಲ್ಲವೆ ಪದಗಳ ಸೇರ್ಪಡೆ, ಹಾಗೂ ಇನ್ನು ಸಾವಿರಾರು ಅಂಶಗಳ ಒಟ್ಟು ಪರಿಣಾಮವೇ ಇಂದಿನ ಭಾಷೆ. ಅದರ ಕಿಂಚಿತ್ತೂ ಜ್ಞಾನವಿಲ್ಲದೆ ಮಾತನ್ನಾಡುವುದಾದರೂ ಹೇಗೆ ಸರಿಹೇಳಿ?  ಭಾಷೆಯ ವಿಕಾಸ ಬಹಳ ಹಿಂದಿನಿಂದಲೂ ನಡೆದು ಬಂದಿದೆ. ಆದಿ ಕಾಲದಲ್ಲಿ ಭಾಷೆಯು ಕೇವಲ ಸಂಕೇತಗಳಿಂದ ಶುರುವಾಯಿತು. ಬಂಡೆ ಕಲ್ಲಿನ ಮೇಲೆ, ಗುಹೆಗಳಲ್ಲಿ, ಅದರ ನಿದರ್ಶನಗಳಿವೆ. ಎಷ್ಟೋ ಸಂಕೇತಗಳನ್ನು ತರ್ಜುಮೆ ಮಾಡಲು ಸಾಧ್ಯವಾಗಲೇ ಇಲ್ಲ.  ವೀರಗಲ್ಲು, ಮಾಸ್ತಿಗಲ್ಲುಗಳಲ್ಲಿ ಸಂಕೇತದ ಪುನರಾವರ್ತನೆಯನ್ನು ನಾವು ಕಾಣಬಹುದು. ಕಾಲ ಬದಲಾದಂತೆ ಸಂಕೇತಗಳು ಬದಲಾಗಿ ಅಕ್ಷರಗಳು ನೆಲೆಯೂರಲು ಆರಂಬಿಸಿತು. ಹಲವಾರು ಮಹನೀಯರ, ಜನಪದರ ಪರಿಶ್ರಮದಿಂದ ಭಾಷೆಯು ಸುಲಲಿತವಾಗಿದೆ ಹಾಗೂ ಸುಂದರವಾಗಿದೆ.
ನಮ್ಮಲ್ಲಿರುವ ಹಲವು ಭಾಷೆಗಳು ವಿವಿದತೆಯಲ್ಲಿ ಏಕತೆಯನ್ನು ಪ್ರತಿಬಿಂಬಿಸುತ್ತದೆ. ಬೇರೆ ದೇಶಗಳಲ್ಲಿ ಬೆರಳೆಣಿಕೆಯ ಸಂಖ್ಯೆಯ ಭಾಷೆಗಳು ವಿಕಾಸವಾದರೆ, ನಮ್ಮಲ್ಲಿ ಆ ಸಮಯದಲ್ಲೆ ಹತ್ತಾರು ಭಾಷೆಗಳ ವಿಕಸನವಾಗಿದೆ. ಇದು ನಮ್ಮ ಬಹುಸಂಸ್ಕೃತಿಯನ್ನು ತೋರಿಸುತ್ತದೆ. ಹಾಗಿರಬೇಕಾದರೆ ಸಹಸ್ರಾರು ಇತಿಹಾಸವಿರುವ ಒಂದು ಭಾಷೆಯನ್ನು ಅದರ ಅರಿವಿಲ್ಲದೆ ರಂಗೋಲಿ ಭಾಷೆ ಎಂದು ಜರಿಯುವುದು ಸಣ್ಣತನವನ್ನು ತೋರಿಸುತ್ತದೆ. ಯಾರಿಗೇ ಆಗಲಿ ತಮ್ಮ ಭಾಷೆಯ ಬಗ್ಗೆ ಅಭಿಮಾನ-ಪ್ರೀತಿಯಿರುವುದು ತಪ್ಪಲ್ಲ. ಆದರೆ ಬೇರೆ ಭಾಷೆಯ ಮೇಲೆ ಅಸಡ್ಡೆ, ಅಗೌರವಗಳಿರಬಾರದು.
ಕನ್ನಡವನ್ನು ಪ್ರೀತಿಸಿ, ಪೂಜಿಸಿ, ಆದರಿಸಿ ಇತರೇ ಭಾಷೆಗಳನ್ನೂ ಕಲಿಯಿರಿ.